LAOAG CITY – Agkasapulan ti naruay a nurses ken midwives ti pagilian nga United Kingdom kangrunaan na idiay England ken Scotland.
Segun ken ni Mrs. Anne Marie Lizette B. Atuan, manager ti Public Employment Service Office wenno PESO ti gobierno probinsial, daytoy ti kangrunaan a rason a nangisayangkat ti Perpetual Help Placement Services International Inc. ti Special Recruitment Activity iti MSME incubation center iti kallabes.
Nupay kasta, inbatadna a kalpasan ti maysa nga aldaw nga Special Recruitment Activity ket adu pay ti kasapulanda nga ipatulod para iti National Health Services ken kadagiti pribado a hospital kadagiti nadakamat a lugar idiay United Kingdom ket manamnama a makipaset ti nasao a recruitment agency iti job fair a maisayangkat intono Hunio dose a kaaldawan ti panagwaywayas ti pagilian.
Inbunannagna a ti nasao nga aktibidad ket pakikammayyetan ti gobierno probinsial babaen ti Public Employment Service Office iti Robinsons Mall a mangisayangkat ti independence day job fair kadagiti amin a lugar a pakasarakan iti nasao nga establisimento ken iti tulong ti Department of Labor and Employment wenno DOLE.
Mainaig iti daytoy, gutgutiguten ni Atuan dagiti nurses ken midwives a kakailian nga interesado a mapan agtrabaho iti ballasiw-taaw a manggundaway iti daytoy a diaya ti nasao a recruitment agency.
Inpalgakna nga agkakapintas dagiti naipalaon iti “recruitment package” para kadagiti mapagasatan a maipatulud iti nadakamat a pagilian.
Inlawlawagna a malaksid a dakkel ti sueldo, agur-uray pay ti “enhanced pay” wenno nayun a sueldo dagiti agtrabaho iti rabii, mabayadan ti tallopulo ket lima nga aldaw a holiday iti makatawen, mabayadan pay ti Nursing and Midwifery Council fees, CBT wenno computer based test funded, certificate of sponsorship funded, VISA funded, libre a flight ken panagbiahe idiay United Kingdom, libre nga OSCE wenno objective structured clinical examination training ken adda pundona ti umuna nga OSCE test.
Inpasigurado pay ni Atuan nga awan ti pannakapeke dagiti agaplikar gapu ta napasingkedan nga immuna iti Phil. Overseas Employment Administration nga adda slot ti nadakamat a recruitment agency a maipatulod idiay United Kingdom.
