LAOAG CITY – Maisagsaganan dagiti kasapulan a dokumento para iti pannakaipila ti kaso nga Attempted rape kontra iti maysa a lalaki iti ciudad ti Batac gapo iti gandat a panangrames na iti maysa a menor de edad.
Daytoy ti inpakammo ni Police Lt. Col. Adrian Gayuchan, ti chief of police ti Philippine National Police iti nadakamat a ciudad.
Segun kenni Gayuchan, naginom ti nasanger ti suspek ken ti ama ti biktima ken rumrumuar nga idi nabartek dagitoy ket immasideg ti suspek iti ayan ti biktima nga adda iti ruwar ti pagtaengan da.
Kunana a ditoy nga inbaga ti suspek iti biktima a sumrek da iti pagtaengan da partikular iti kwarto gapo ta adda ti ited na kenkuana.
Ditoy metten a kellaat nga induron ti suspek ti biktima iti kama ken ditoyen a minolestiya na.
Nupay kasta, nakita ti ina ti ubing rason a nalapdan ti dakes pay a paggep ti suspek.
Dagus met a naireport daytoy iti Philippine National Police iti nasao a ciudad ken natiliw ti suspek nga iti agdama ket adda iti kustudiyar dagiti otoridad.
