LAOAG CITY – Inpakaammo ni Budget Secretary Amenah Pangandaman nga inaprobaranen ni Presidente Ferdinand “Bongbong” Marcos Jr. ti nailungalong a P5.768 trillion national budget kabayatan ti naiyuswat a Cabinet meeting.
Ti proposed 2024 national budget ket 9.5% a nangatngato nu ikompara iti P5.268 trillion budget ita a tawen.
Kuna ni Pangandaman a ti nasao a budget ket nagpokus expenditures para iti economic growth ti pagilian ken pannakaipaay ti solosyun kadagiti epekto ti inflation.
Inpakaammo na a ti budget ket naadal kas addang para iti pannakagun-od ti upper-middle-income status ti pagilian bayat a maipababa met ti deficit iti 3% a Gross domestic product ken pannakakissay ti poverty rate agingga iti 9% wenno single digit apaman a matapugan ti 2028.
Mainaig iti daytoy, inbatad ni Pangandaman a kalpasan a naaprubaran ti proposed budget ket maawaganen iti President’s Budget.
Innayun na a maisubmitir met ti budget iti kongreso sumagmamano a lawas kalpasan ti maikadua nga State of the Nation Address ti Presidente intuno Hulyo.
Inbunannag na a masapol met a dagiti maseknan nga ahensya ket maddaan ti suporta ken naan-anay a panangibunong ti President’s Budget kabayatan dagiti maiyuswat a congressional deliberations.
