LAOAG CITY – Inpetteng ni Mr. Ronniemar Rebollido, ti anak ti subject ti search operasyon a ni Ronnie Rebollido iti Barangay Calayab ditoy ciudad ti Laoag a nakasagana da a mangawat kadagiti pulis para iti iyuswat da nga operasyon no nasurot kuma ti proseso.
Segun ken ni RonnieMar, ummuna kuma a naibaga kadakuada nga adda ti search warrant da ngem kabaliktaran ti napasamak gapo ta ummuna a simrek dgiti dua a lallaki no sadinno nakasarita na dagitoy gapo ta mapan kuma agdigos iti dayta nga oras ngem inbaga ti maseknan a lalaki a rumuaren a dagus ken saan a sinungbatan daytoy ti saludsod na no anya ti rason.
Patien na nga awan ti paltog wenno bala iti kwarto dagiti nagannak kenkuana gapo ta sumsumrek dagiti ubbing nga agtawen ti dua ken uppat ken mabalin a maay-ayam dagitoy.
Kunana a mailasin na no siasinno dagiti simrek iti pagtaengan da ken dagitoy ket maipagarop a nagtaray a nagna iti likod a paset ti balay da.
Kastoy met ti takder ni Mr. Mark, ti manugang ni Mr. Ronnie Rebollido gapo ta idi mapan kuman agtrabaho ket adda ti nangeg iti ruwar ken idi sinirip na ket adda dagiti nakita na a pulis.
Nupay kasta, idi nakasideg iti ridaw da ket maipagarop nga adda ti nangiduron iti ridaw ket pinarwar da isuna ken dagiti dadduma nga adda iti uneg ti pagtaengan ngem dagitoy ket nagbati.
Dinakamat na a sinaludsod na met kadagiti otoridad no siasinno dagiti simrek iti pagtaengan da ngem rumrumuar a saan a pulos a simmungbat dagitoy.
Kabayatanna, kuna met ni Barangay Chairwoman Madelyn Padayao nga awan met ti rekord ni Rebollido iti barangay da.
Innayon na a saan da nga ammo ti dinakamat ni Rebollido seknan iti maipagarop a panagtutok ti paltog gapo ta saan a naireport iti barangay.
