LAOAG CITY – Negatibo ti resulta ti naiyuswat a search operation iti pagtaengan ti baro iti Sitio 4, Barangay Bagbago iti ili ti Solsona.
Nabigbig met ti subject ti operasyon a ni Harold Daguro, agtawen ti 30, awanan ti asawa, mannalon ken residente iti nasao a barangay.
Ti search warrant ket inparuk-at ti Regional Trial Court Branch 13 gapo iti panaglabsing iti Republic Act 10591 wenno iligal a panagikot ti paltog.
Nupay kasta, kalpasan ti panagsukimat dagiti otoridad iti uneg ti pagtaengan ni Daguro ket awan ti nakita dagitoy a paltog.
Naamoan a ti laeng naala iti pagtaengan ni Daguro ket airgun nga isu inbaga ti maseknan nga us-usaren na kadagiti tumatayab.
Ummunan nga inpetteng ni Daguro a patien na a dakes a tao ti nangireport kenkuana gapo ta awan met ti aramidn na nga iligal.
Inbatad met ti ina na a ni Mrs. Juanita Daguro a ti pakakumikoman ti anak na ket ti panagtaraken ti baboy ken panagtalon.
