LAOAG CITY – Inpakaammo ni Provincial Veterinarian Dr. Loida Valenzuela a nagparbeng ti kaso ti rabies ditoy Ilocos Norte kadagitoy a gundaway.
Mainaig iti daytoy, inpalagipna kadagiti kakailian nga adda ti tarakenna nga aso a ti panagtaraken ti aso ket kas met laeng ti agtaraken ti maysa nga ubing a masapul a maipaayan dagitoy ti nasayaat a pannakaasikaso.
Inbatadna a masapul a maipaayan dagiti taraken ti umdas a taraon ken ti maysa a nataenganen nga aso a “native” ket kaibatugan ti kanen ti tallo nga ubbing.
Malaksid iti daytoy, kunana a masapul a saan a mapalubusan nga agwarang-warang dagitoy kadagiti kalsada wenno nasken a maigalut wenno maipupuk dagitoy.
Segun ken ni Valenzuela, maibilang nga irresponsable dagiti adda tarakenna nga aso nga agwarang-warang.
Inlawlawagna pay a no saan a kayat ti maawagan nga irresponsable, nasken nga aramiden ti umno a pananglapped iti panagwaras ti rabies nangnangruna iti aso.
