LAOAG CITY – Umaboten iti 103 a registered firearms ti naisuko iti nagduduma a police stations iti intero a probinsya sipud idi Enero agingga ita a bolan.
Daytoy ti inbatad ni Police Major Jephre Taccad, ti pannakangiwat iti Ilocos Norte Police Provincial Office (INPPO).
Inlawlawag na a kaadoan kadagiti napan nangisuko ti paltog na ket dagiti opisyles ti barangay ditoy probinsya.
Inpakaammo ni Taccad nga agtultuloy ti panangallukoy ken panagpanawagan da kadagiti gun holders a saan pay a napan nangideposito ti paltog na a silulukat a kanayun dagiti police stations iti intero nga Ilocos Norte.
Immunan nga inrakurak ni Provincial Director Police Col. Julius Suriben a kalikagom na a maideposito amin a paltog dagiti gun holders iti intero a probinsya tapno maliklikan ti pannakausar dagitoy iti aniaman a krimen agingga a saan a malpas ti Barangay ken Sang Kabataan Elections.
