LAOAG CITY – Bimmaba ti bilang ti child labor iti Pilipinas idi 2022 kalpasan ti pannakapaiget ti kampanya kontra iti child labor ti Department of Labor and Employment, kadwa na ti National Council Against Child Labor (NCACL) ken dagiti social partner na.
Iti Special Release on Working Children Situation nga inpublikar ti Philippine Statistics Authority idi Hulyo 25, 2023, umab-abot laengen ti 828,000 nga agtutubo ti karaman iti child labor idi 2022 wenno 56% ti 1.48 milyon nga ubbing nga agtrabtrabaho.
Nababbaba daytoy no ikompara iti bilang dagiti ubbing a mangmangged idi 2021 a 935,000.
Basar iti Department of Labor and Employment, agtawen ti 15 ti kaubingan a mabalin nga agtrabaho iti pagilyan basar iti agdama a linteg.
Gapu iti daytoy, dagiti ubbing nga agtawen ti 15 agingga iti 18 ket legal a mapalpalubusan nga agtrabaho iti kondisyon a saan da a makipaset iti child labor.
Ti child labor ket aniaman a trabaho wenno pang-ekonomiya nga aktibidad a maipapaaramid iti maysa nga ubing a maibilang a makadadael iti salun-at ken seguridad na, pisikal, mental, wenno psychosocial a panagdur-as.
Inpakaammo ni Labor Secretary Bienvenido E. Laguesma a kaadoan ti bilang ti child laborer ket iti sektor ti agrikultura manipod iti Rehiyon 12.
