LAOAG CITY – Agpada a pimmusay dagiti dua a lallaki a nagkalubbon iti motorsiklo kalpasan ti pannakadesgrasya da iti bypass road, bisinidad ti Barangay Pila ditoy ciudad ti Laoag.
Nabigbig dagitoy nga isuna Jay Francisco Batuulayan, agtawen ti 23 ken residente iti Barangay Camguidan iti ciudad ti Batac ken ni Kevin Leo Alibuyog Galut, agtawen ti 25 ken residente iti Barangay Maipalig, Batac City.
Iti inisyal nga imbestigasyon dagiti otoridad, agpaabagatan dagiti biktima a nakalugan iti motorsiklo idi napukawan ti driver ti kontrol iti manibela a rason ti pannakaidungpar na iti concrete barrier nga adda iti igid ti kalsada.
Kas resulta, naitapwak dagiti biktima iti kanal agarop 12 a kadapan ti kangato na isut gapo na a nagsagaba da ti nakana a sugat iti nagduduma a paset ti bagi da.
Naitaray met iti Gov. Roque Ablan Sr. Memorial Hospital ditoy ciudad ti Laoag dagiti biktima ngem naideklara dagitoy a dead on arrival.
Kabayatanna, naamoan nga agpada a nakasuot dagiti biktima ti helmet ken maipagarop a nakainom dagitoy ti nasanger.
Iti agdama, agtultuloy ti naun-uneg nga imbestigasyon ti Philippine National Police ditoy ciudad ti Laoag iti nasao nga insidente.
