LAOAG CITY – Addan ti 36 a pamilya manipud kadagiti lima barangay ditoy ciudad ti Laoag ti naibakwit gapo iti epekto ti Super Typhoon Goring.
Daytoy ti inpakammo ni Mr. Jerry Fermin, mangidadaulo ti City Disaster Risk Reduction and Management Office ditoy ciudad ti Laoag.
Segun kenni Fermin, kaadoan kadagiti naapektaran iti Super Typhoon Goring ket isu met laeng ti kangrunaan nga apektado idi dimmuprak ti Bagyo Egay.
Inlawlawag na a dagiti pay mismo a residente ti nagboluntaryo nga agbakwit ken nagtalinaed da pay laeng iti Barangay Hall dagitoy.
Mainaig iti daytoy, kunana a naiget met ti panagmonitor da kadagiti amin a barangay ditoy ciudad ti Laoag.
Kabayatanna, iti met ciudad ti Batac ket addan ti 13 a pmailya ti naibakwit ken adda da iti City Evacuation Center.
Naamoan a siyam a pamilya ket manipud Barangay Ricarte, dua iti Sitio Bulilisin iti Barangay Cangrunaan ken saggaysa met a pamilya iti Barangay San Pedro ken Baoa East.
