LAOAG CITY – Inbinsa-binsa ni Governor Matthew Marcos-Manotoc iti State of the Province Address (SOPA) na dagiti nagapwanan ti liderato na ken dagiti plano na pay nga ipatungpal para iti pagsayaatan dagiti umili ditoy Ilocos Norte.
Karaman kadagiti inpanakkel ti gobernador ket ti panagngato ti bilang dagiti naaddaan ti panggedan wenno trabaho ditoy probinsya.
Basar iti dato, ti employment rate ket ngimmato iti 98.9% a idi 2022 manipud iti 97.2% idi 2021.
Inkari ti gobernador nga aramiden amin ti gobierno na tapno ad-adda pay nga umado ti bilang dagiti maaddaan ti trabaho kabayatan ti panagtakem na ditoy probinsya.
Inpanakkel pay ni Manotoc a bimmaba ti 2.5% ti poverty rate ditoy probinsya, ti maibilang a kababaan ti poverty rate na iti intero a rehiyon Uno.
Malaksid iti daytoy, inpanakkel pay ni Manotoc ti panagngato ti bilang dagiti turista nga immay bimmisita ditoy probinsya.
Inrakurak ti gobernador a basar iti datos ket nairekord ti 3-milyon a turista ditoy probinsya idi 2022 manipod iti 800 a ribo idi 2021.
Mainaig iti daytoy, inkari ni Governor Manotoc nga agtultuloy ti panangsuporta ti gobierno na iti sektor ti agrikultura no sadinno a binigbig na ti kadakkel ti kontribusyon dagiti mannalon ken uray dagiti mangngalap iti ekonomiya ditoy probinsya.
Ibilang pay ni Manotoc ti agrikultura nga isu ti mangbiag iti probinsya ken inpanamnama na nga awan ti mabati kadagitoy iti panagdur-as ti Ilocos Norte gapu ta isuda ti maysa kadagiti prayoridad ti gobierno na a matulungan.
Linagip pay ti gobernador ti kaado dagiti nadadael gapu iti iduduprak ti bagyo Egay ken dadduma a kalamidad ditoy probinsya ngem babaen ti tulong ti gobierno national ken dadduma pay nga stakeholders ket in-inot a bimmangon ti probinsya ken naipaayan ti naan-anay a tulong dagiti kangrunaan a nadidigraan kangrunaan na dagiti nadadaelan ti balay.
Kabayatanna, inpanakkel pay ti gobernador ti panagbalinen ti probinsya kas African Swine Fever (ASF) Virus free ken ti panagbaba iti 3 a pisos iti kada kilowatt hour iti kuryente.
Nadakamat pay ti gobernador ket ti umad-ado nga health facilities a maipaspasdek ditoy probinsya tapno masigurado a matutukan ti salun-at dagiti umili, kagiddan ti panangipannakkel na a bimmaban ti kaso ti malnutrition iti Ilocos Norte.
Saan met a nalipatan ti gobernador a nagyamanan dagiti amin a timmulong ken agtultuloy a tumultulong iti gobierno na kangrunaan na kada Presidente Ferdinand Marcos Jr., Senador Imee Marcos, Congressman Sandro Marcos ken ni Congressman Angelo Marcos Barba tapno magun-od dagiti arapaap na a pagbalinan ti Ilocos Norte kangrunaan na ti naan-anay a pannakaipaay ti tulong kadagiti umili.
Ti State of the Province Addrees ni Governor Manotoc ket naiyuswat iti Plaza del Norte Hotel and Convention Center iti ili ti Paoay ken inatendaran amin dagiti lokal nga opisyal ken dadduma pay nga organisasyon iti intero nga Ilocos Norte.
