LAOAG CITY – Nagsagaba ti sugat iti nagduduma a paset ti maysa a babai a nakalugan ti electric bike kalpasan a nadungpar ti maysa a Toyota Fortuner iti ili ti Sarrat.
Binigbig ni Police Capt. Raycar Almazan, ti chief of police iti ili ti Sarrat ti biktima a ni Darmelyn Cayanong, agtawen ti 24 ken residente iti Brgy. 5 iti metlaeng nasao nga ili idinto a ti nangiturong ti Toyota Fortuner ket ni Randy Agcaoili, agtawen ti 39, naasawaan, mangisursuro ken residente iti Brgy. 7, Alejo Malasig iti ili ti Vintar.
Basar iti insayangkat nga imbestigasyon dagiti otoridad, agpadpadaya ti biktima idi nadungpar ti agpapaamyanan ken napardas ti taray na a fortuner.
Naamoan a saan pulos a sinardengan ti suspek ti biktima ngem babaen iti naisayangkat a drag net operation iti tulong dagiti kabangibang a kuerpo ti pulisya ket natiliw metlaeng ti nangiturong iti fortuner.
Nupay kasta, inpakaammo ni Almazan nga iti panagsasango ti dua a partido iti kwerpo ti pulisya ket nagtutulag da a bayadan ti mangisursuro ti magastos ti biktima iti pannakapaagas na iti Governor Roque Ablan Senior Memorial Hospital (GRASMH) ditoy ciudad ti Laoag.
Innayon ni Almazan a saanen nga interesado ti pamilya ti biktima a mangipila ti kaso kontra iti nasao a magisursuro.
