LAOAG CITY – Nagkabil ti dua a tricycle driver iti Brgy. Madamba iti ili ti Dingras.
Basar iti Philippine National Police iti nasao nga ili, apaman a nakaawatda ti report maipapan iti nasao nga insidente ket ditoy a nadanonanda nga agkabkabil pay laeng dagiti dua a lallaki.
Gapu iti sinagabada a sugat ket dagus dagitoy a naitaray iti Dingras District Hospital para iti naan-anay a pannakatamingda.
Maibasar iti nasaiyangkat nga imbestigasion, adda ti nabara a saan a nagkinnaawatan dagiti dua a tricycle driver a nangitunda ti panagriri dagitoy no sadino ket nagusarda pay ti dua a tubular steels wenno landok ken mauled B nga isu metten ti rason a nagsagabada ti sugat iti ulo ken dadduma pay a paset ti bagida.
Mainaig iti daytoy, bayat ti nabara a komosion dagiti dua a a maseknan ket napan innala ti maysa a tricycle driver ti landok iti kapadana nga agpaspasada ket ditoy a kellaat nga inbaotna iti ulo ken sumagmamano a paset ti bagi ti padana a tricycle driver a nangitunda ti dagus a panagtedted ti dara.
Kabayatanna, ti napasamak nga insidente ket gapu iti datin a susik iti panagpasada dagiti dua a tricycle driver.
Iti agdama, nakaruararen iti ospital dagiti maseknan ken manarimaan nga agpapaimbag dagitoy.
Naammoan a kimmanunong dagiti dua nga agsinnumbangir a partido a masolbar daytoy nagbaetanda a parikot babaen ti pannakaiyendorsoda iti Barangay Lupon.
