LAOAG CITY – Inpakaammo ni Fire Superintendent Roxanne Parado, ti Provincial Fire Marshal ti Bureau of Fire Protection ditoy Ilocos Norte nga adda ti maipasdek a Watch Tower kadagiti 6 nga ili ditoy Ilocos Norte tapno malappedan dagiti grass wenno forest fire iti kabanbantayan.
Inbatadna nga addan ti disenio ti maipasdek a Watch Tower kadagiti kabanbantayan ken dagiti lugar a pakaipatakderanna a maibilang a forest fire prone areas a Local Government Units kas iti ili ti Nueva Era, Solsona, Piddig, Carasi, Burgos ken Vintar.
Nupay kasta, inpalgakna a ti laengen maiyur-uray ket ti pannakailatang ti pundo tapno dagus daytoy a marugianen.
Kunana a dakkel a tulong ti nabukel nga Ilocos Norte Fire Fighting Task Group a bukbuklen dagiti uniformed units ken dagiti civilian para iti pannakasebseb dagiti maur-uram a kabanbantayan.
Mainaig iti daytoy, kuna ni Fire Superintendent Parado nga adda ti nairekordda ti 71 fire incidents.
Segun kenkuana, kadagupan ti nasao a bilang ket 24 ditoy ket forest fire no sadino naideklara laeng a fire out dagiti tallo nga uram ita nga aldaw.
Inbatadna a nagbalin a makumikom dagiti bumbero iti naglabas a Semana Santa gapu ta adu dagiti napanda nirespondean nga uram kadagiti kabanbantayan.
Kunana a kaduada a timmulong ti Marines, Philippine National Police pakairamanan dagiti forest rangers ken dagiti barangay officials kadagiti naapektaran a lugar.
Inlawlawagna a dagiti posible nga adda iti likudan dagiti mapaspasamak nga uram kadagiti kabanbantayan ket dagiti agal-ala ti honey, itlog ti abuos ken dagiti agpupuor a panawanda a nakasindi.
Innayonna a manarimaan pay laeng ti panangalada kadagiti reports maipanggep iti kalawa dagiti naapektaran a bantay.
