LAOAG CITY – Dakkel ti pammati ni Senador Ronald “Bato” dela Rosa nga aprubaran iti Senado ti mandatory a Reserve Officers’ Training Corps (ROTC) ngem aminado a bassit laeng ti tiyansa na.
Kuna ni Dela Rosa a kiniddaw na a maiyuswat manen ti debate mainaig iti daytoy gapu ta naiget ti panangsuporta na ti panagsubli ti Reserve Officers’ Training Corps.
Immunan nga inrakurak ni Senate President Juan Miguel Zubiri nga iprayoridad na ti debate iti Bill 2034 intono Mayo.
Addan iti maikadwa a pannakaibasa ti Mandatory Reserve Officers’ Training Corps Bill (Senate Bill 2034) a naudi a naaddaan ti interpelasyon idi Setyembre 25, 2023.
Nailanad it gakat nga ipadalan amin dagiti estudyante a naka-enroll iti nasurok a two-year undergraduate degree, diploma, wenno certificate programs iti higher education institutions (HEIs) ken technical-vocational institutions (TVIs), iti Mandatory Reserve Officers’ Training Corps program nga aramiden daytoy iti uneg ti uppat a semestre.
Naipalaon pay iti gakat a no bilang saan a malpas ti Mandatory Reserve Officers’ Training Corps program ti siasinno man nga estudyante ket saan a makaturpos.
Sumango met ti amin a pagadalan iti pannusa a disiplinaryo ken administratibo no mapaay da a mangipatungpal ti Mandatory Reserve Officers’ Training Corps manipod iti Commission on Higher Education ken Technical Education and Skills Development Authority. Maipalagip a naibasura ti mandatory Mandatory Reserve Officers’ Training Corps program idi 2002 kalpasan a naipasa ti Republic Act 9163, a nangbuwangay ti NSTP wenno National Service Training Program.
