LAOAG CITY – Nangipatulod ti gobierno ti Kenya ti team nga agimbestigar iti panagswek ti military helicopter a nakatayan ti 10 nga opisyal a pakairamanan ni military chief Gen Francis Ogolla.
Agpapan ita ket saan pay a nalawag no ania ti makaigapu ti panagswek ti nasao nga helicopter.
Malaksid kadagiti 10 a pimmusay ket adda pay ti dua a nakalasat ngem agpapan kadagitoy a gundaway ket nagtalinaed dagitoy a kritikal ken manarimaan da a maag-agasan iti ospital.
Naamoan a ti bangkay dagiti biktima ket naikabil da amin idiay Nairobi ken ti four-star general ket maitabon ita nga aldaw iti mismo a balay na iti western Siaya county.
Maipalagip a kalpasan ti nasao nga insidente ket indeklarar a dagus ni President William Ruto ti tallo nga aldaw a panagladladingit gapu ta ibilang na ti napasamak kas “moment of great sadness” para iti pagilian da.
