LAOAG CITY – Balligi ti pannakaisayangkat ti 2024 Region 1 Athletic Association Meet ditoy Ilocos Norte.
Daytoy ti naragsak nga inpakaammo ni Atty. Donato Balderas Jr. ti Schools Division Superintendent ti Department of Education ti Ilocos Norte.
Segun kenkuana, maibilang a daytoy ti kapintasan ken kaurnusan a Region 1 Athletic Association Meet a naangay ditoy probinsia kas maibasar kadagiti naipadanon kenkuana a panangdayaw dagiti atleta, coaches, technical officials ken dadduma pay.
Malaksid iti daytoy, inpasingkedna nga ad-adda pay a papintasenda dagiti sports facilities tapno mapasayaat pay dagiti pakaisayangkatan dagiti traning dagiti umaayam para iti panagsagsagana iti Palarong Pambansa.
Inbatadna a manamnama a makipaset ni Gov. Matthew Marcos Manotoc kas maysa kadagiti naisangsangayan a bisita iti maiyuswat nga Awarding wenno Closing Remarks ti Region 1 Athletic Association Meet ita nga aldaw.
Mainaig iti daytoy, kunana a no maipanggep kadagiti premio a maited kadagiti nangabak iti nagduduma nga sports events ket trophy laeng ken awan ti cash prize dagitoy.
Nupay kasta, inlawlawagna a nakadepende kadagiti maseknan a Local Government Unit no mangipaayda ti cash prize wenno saan.
Kabayatanna, naammoan a manamnama nga adda pay ti maipaay nga special awards kas ti Best Team, Best in Basketball, Best in Effort ken dadduma pay.
