LAOAG CITY – Inpalubos ti Department of Agriculture nga agangkat ti 25 a ribu a metriko tonelada ti frozen fish para kadagiti merkado publiko tapno masigurado nga stable ti suplay ti ikan sakbay ti closed fishing season.
Iti babaen ti Memorandum Order No. 17, inyisyu ti Department of Agriculture ti Certificate of Necessity to Import ti 25 a ribu a metriko tonelada ti frozen small pelagic fish para kadagiti merkado publiko manipod inton Oktubre 1 agingga Disiembre 31, 2024.
Ti bilang ket nababbaba ti 35 a ribu a metriko tonelada nga allowable imports iti napalabas a tawen.
Basar iti Department of Agriculture a ti Maximum Importable Volume iti babaen ti Certificate of Necessity to Import ket maiyalokar para kadagiti registered importer.
Nangiparuk-at pay daytoy ti pagannurutan iti alokasion iti qualified importer.
Iti baet daytoy, kinuna ti National Federation of Small Fisherfolk Organization in the Philippines wenno PAMALAKAYA a ti panagangkat ti ikan ket awan ti pagbasaran ken posible a makaapektar daytoy iti lokal nga industria ti pagilian.
