LAOAG CITY – Ikonkonsiderar ti Commission on Elections (Comelec) a saaan a palubusan iti substitution no agwithdraw ti maysa a kandidato kalpasan ti Oktubre 8, 2024 a deadline para iti panagpila ti kandidatura para iti midterm elections iti sumaruno a tawen.
Inbatad ni Commission on Elections chairperson George Erwin Garcia nga inrekomendar na ti nasao a lungalong iti taripnong ti poll body en banc iti napalabas a lawas.
Kuna pay ni Garcia a ti baro a pagalagadan ket paset ti trabaho da kas maysa a constitutional body ken gagem na a maisardeng ti pananillaw kadagiti botante.
Inpalgak pay ni Garcia a mapalubusan a masukatan ti maysa a kandidato no pumusay wenno madiskwalipika.
Innayon ni Garcia a ti panagsukat ket mabalin agingga iti kaaldawan ti eleksyon ngem masapol a ti sumukat ket kapada metlaeng ti apilyedo ti masukatan a kandidato ken agpada ti partido.
