Inbatad ti Department of Agriculture (DA) nga ikonkonsiderar na ti panangpaatiddog ti import ban ti sibuyas wenno panangkissay ti import volume kalpasan ti panagapit manipud Marso agingga iti Abril.
Segun iti Philippine Statistics Authority (PSA), nakairekord ti industria ti sibuyas iti 28.58 percent a panagngato ti produksion a katupad ti P8.098 bilion, nangatngato ngem iti P6.298 bilion nga output iti isu met laeng a panawen idi napan a tawen iti umuna a kuarter ti 2024.
Inbatad ni Agriculture Assistant Secretary Arnel de Mesa a makikoordenar da iti Bureau of Plant Industry (BPI) tapno kuentaen ti aktual a suplay inton Mayo.
Mainaig iti daytoy, ngimmato ti produksion iti 40 pecent ti daga a namulaan iti sibuyas manipud 2023.
Kabayatanna, immuna a kiniddaw ti Philippine Chamber of Agriculture and Food Inc. (PCAFI) nga agangkat iti sibuyas inton Mayo gapu iti El Niño phenomenon a nangpakaro iti epekto ti pannakapeste ti armyworm.
