LAOAG CITY – Inrakurak ti Department of Health wenno DOH a mapatta-patta nga adda ti 190,000 a kurang ti Pilipinas kadagiti healthcare workers iti pagilian.
Segun ken ni Health Secretary Ted Herbosa, karaman ti National Human Resources Master Plan 2020-2040 kadagiti inpresentar da ken ni Presidente Bongbong Marcos iti naiyuswat a sectoral meeting.
Inlawlawag ni Herbosa a maysa kadagiti kangrunaan a makaigapu ti panagkurang dagiti health workers ket ti panag-migrate ken panagbalin nga overseas Filipino worker dagiti healthcare worker.
Basar iti datos nga inpaay ni Migrant Worker Secretary Hans Leo Cacdac, 74% kadagiti healthcare workers a a pumanpanaw iti pagilian ket nurses.
Inpakaammo ni Herbosa nga adda dagiti makitkita da a sumagmamano a solusyon tapno masolusyonan ti dakkel a panagkurkurang iti human resources ti healthcare sector.
Karaman ditoy ti panangipaay ti health insurance, pabahay, ken dagiti scholarship para kadagiti health worker a kalikagom na pay a madevelop ti karera da.
Gagem daytoy a gutiguten dagiti healthcare worker a pilyen laengen ti agtrabaho iti Pilipinas.
