LAOAG CITY – Inbatad ni Miss Angie Yabo iti Barangay San Marcelino iti ili ti Dingras a mabalin a saan a pimmusay ti kaanakan na nga Half British ken maysa a kameng ti LGBTQ wenno lesbian, gay, bisexual, transgender and Queer no nadalusan a naimbag ti irigasyon a nakalmesan na.
Segun ken ni Yabo, nabayag nga awan ti danom ti irigasyon gapu ta kalpasan ti napasamak a bagyo idi 2002 ket nadadael ti dalan iti irigasyon isut gapuna a kayat da a maamoan no nadalusan daytoy sakbay nga insubli dagiti maseknan ti danom.
Inlawlawag na nga adda da metten dagiti nadamdamag da a nalmes iti lugar ngem saan a nakaro dagiti pinasar da a sugat ken saan da a pimmusay.
Kuna na ti kaanakan na ket ado dagiti sinagaba na a nakana a sugat iti nagduduma a paset ti bagina, karaman ti ulona gapu ta adda dagiti nakaisalatan na a kayo.
Gapu iti daytoy, inpetteng ni Yabo a masapol koma a maikkan ti kalub wenno alad ti irigasyon tapno awanen dagiti possible a mairisgo pay ti biagna a kas iti napasamak iti kaanakan na.
Immuna iti daytoy, inpakaammo ni Yabo a basar kadagiti nakakita iti napasamak ket agtugtugaw laeng ti kaanakan na iti igid ti irigasyon ken inkuykuyakoy na ti saka na iti danom a masansan nga ar-aramiden na.
Possible a naikawa wenno aksidente laeng a natnag ti biktima iti irigasyon a poon metten ti nakalmesan ken nakatayan na gapu iti pannakaisalat na ti kayo.
Mainaig iti daytoy, inpalgak ti ina ti biktima a ni Mrs. Emy Yabo Bangi a masapol a masimpa koma a nasayaat ti irigasyon tapno awanen dagiti sumaruno a malmes pay.
Kuna na a makaluban koma ti irigasyon ken masimpa a nasayaat dagiti abot na gapu ta isu ti immusukan dagiti batbato ken kayo a nakaisalatan ti anakna.
Mamati ni Bangi a no awan ti kayo a nakaisalatan ti anakna ket dakkel ti namnama na a nagbiag daytoy.
Kabayatanna, inbatad ni Mr. Denver Dela Cruz, ti federated President Zanjera iti San Marcelino iti ili ti Dingras nga aksidente laeng ti napasamak a pannakalmes ti biktima iti nasao nga irigasyon.
Immapela nga awan koma ti babalawen dagiti maseknan gapu ta ti laeng gagem na kas mangidaulo iti Sanghera iti nadakamat a barangay ket tumulong kadagiti pada na a mannalon.
Innayon na a sakbay nga insubli da ti danom iti irigasyon ket dinalusan da paylaeng nga immuna.
