LAOAG CITY – Inpasingked ni Engr. Rommel Batuac, ti Chief Operation iti National Irrigation Administration a maikkan ti serra ti irrigation canal a nakalmesan ken nakatayan ti maysa nga agtutubo iti Sitio Nalasin, Brgy. San Marcelino iti ili ti Dingras.
Segun kenkuana, babaen iti daytoy ket maliklikan nga adda ti kapada nga insidente a mapasamak ken maiyadayo iti risgo iti asinoman nga indibidual.
Inbatadna a daytoy ti maysa a wagas a napanunutanda tapno natalged iti lugar ken awanen ti agbalin a biktima.
Inlawlawagna nga adda dagiti pakdaar nga inpatungpalda ngem inadmitirna a saan a mapakpakadaan ti pasamak.
Immuna iti daytoy, nagkiddaw ti Presidente ti sanjera a ni Mr. Danver Dela Cruz iti nasao nga ahensia ti gobierno iti nadakamat nga addang a maparikepan ti irrigation canal.
Maipalagip nga adda ti maysa nga agtutubo ti pimmusay kalpasan a nalmes iti irrigation canal.
