LAOAG CITY – Balligi a naarestar ti maysa a construction worker babaen iti Anti-Illegal Drug Buy-bust Operation iti Brgy. 6 iti ili ti San Nicolas.
Daytoy ket babaen iti nagtipon a puersa ti Philippine National Police iti nasao nga ili ken ti Provincial Drug Enforcement Unit.
Nabigbig ti suspek a ni Kirby Crisostomo, agtawen ti 44, awanan asawa ken residente iti Brgy. 6 iti ili ti San Nicolas.
Basar iti imbestigasion, natiliw ti suspek kalpasan a naglako daytoy ti maysa a plastic sachet a naglaon ti maipagarup a shabu iti maysa a pulis a nagpammarang a poseur-buyer.
Malaksid iti daytoy, naala pay manipod iti suspek ti lima a plastic sachet a naglaon ti maatap a shabu ken lima a ribu a pisos a nausar kas buy-bust money.
Naammoan a ti nasao a suspek ket datin a naibalud iti Bilibid Prison idi tawen 2008 ngem nakaruar iti pagbaludan idi 2018 gapu met laeng iti panaglabsingna iti Republic Act No. 9165 wenno ti Comprehensive Dangerous Drugs Act of 2002.
Kabayatanna, nadakamat pay iti imbestigasion a ti akusado ket maysa kadagiti maitudtudo a suspek kadagiti mataktakaw a kalding iti ili ti San Nicolas.
