LAOAG CITY – Nasurok nga 40 a tattao, a kaadoan ket babbai ti natay kalpasan a narpuug ti illegal a pagminasan idiay Mali.
Ti insidente ket napasamak iti asideg ti Kéniéba, iti gold-rich Kayes region iti western Mali.
Basar iti report, kimmalay-at dagiti biktima iti open-pit areas nga inaramid dagiti industrial miners tapno kitaen dagiti maregmeg ti balitok idi napasamak ti insidente.
Daytoyen ti maibilang a maikadwa a “deadliest mining incident” iti uneg laeng ti tallo a lawas.
Immuna iti daytoy, natay ti 10 a tattao iti pannakalayos ti mining tunnel iti maudi a paset ti Enero ita a tawen.
Ti Mali ket maysa kadagiti kadakkelan a gold producers iti intero a lubong.
