LAOAG CITY – Inarestar dagiti personnel ti Provincial Drug enforcement Unit ni Michael Kaye Trinidad y Peralta, agtawen ti 31, awanan asawa, electrician ken residente iti Brgy Bayog, iti ili ti Burgos kalpasan nga inpilit na ti napan nangbisita ken nangkasarita kenni Donden Mark Antonio.
Maipalagip a ni Antonio ket immuna a naarestar iti ili ti San Nicolas no sadinno a naalaan daytoy ti maipagarop nga illegal a droga nga agbalor iti nasurok a 2 a milyon a pisos.
Segun ken ni Police Major Sheryl Guzman, ti pannakangiwat iti Ilocos Norte Police Provincial Office, kinasarita da ni Trinidad nga iyuray na lattan ni Antonio iti ruwar ti opisina ti Provincial Drug enforcement Unit gapu ta manarimaan ti pannakaiproseso ti dokomento para iti pannakaipila dagiti reklamo kontra kenkuana.
Inlawlawag da pay ken ni Trinidad a dagiti laeng kabagyan ken abogado ni Antonio ti mabalin a mangbisita kenkuana.
Nupay kasta, kuna ni Guzman nga imbes nga aguray ni Trinidad iti ruwar ti opisina ket kellaat lattan a simrek ken induron na ti maysa kadagiti personel ti Provincial Drug enforcement Unit kalpasan na ket nagderetson iti ayan ni Antonio isut gapuna nga inarestar a dagusen dagiti otoridad.
Inpakaamo ni Guzman nag iti panangarestar da ken ni Trinidad ditoy a naalaan da ti maysa a kutsilyo nga agatiddog ti walo a pulgada.
Gapu iti inaramid ni Trinidad ket sumango iti kaso a panaglabsing iti Article 151 iti Revised Penal Code wenno ti Resistance and disobedience to a person in authority.
Iti agdama, nakabalud ni Trininidad iti Philippine National Police iti ili ti San Nicolas.
