LAOAG CITY – Inrakurak ti Government Service Insurance System (GSIS) nga adda ti 21% a nagngatoan iti net income manipod iti operasyon da idi 2024, gapu ta immabot daytoy iti P135.7 billion no ikumpara iti P112.1 billion idi 2023.
Mangipasimudaag daytoy a ngimmato ti pakabuklan ti assets ti Government Service Insurance System iti 9.23% wenno P1.83 trillion.
Inbatad ti Government Service Insurance System a ti pakabuklan nga income na ket ngimmato iti 10.29% year-on-year ti P326.86 billion.
Ti maibagbaga a rason iti nagngatoan ti napastrek ti Government Service Insurance System ket gapu iti napigsa nga investment returns ken insurance operations.
Innayon ti ahensiya a P13.27 billion income manipod iti foreign exchange ti nainayun, P11.24 billion manipod iti global private equity investments nga iwanwanwan ti external fund managers, ken P3.09 billion manipod iti local equity investments.
