LAOAG CITY – Nakasaganan ti Pilipinas para iti panangisayangkat iti 2025 FIVB Volleyball Men’s World Championships a mangrugi inton Septiembre 12 agingga iti 28 iti SM Mall of Asia Arena ken iti Smart Araneta Coliseum.
Daytoy ti inbatad ni Philippine National Volleyball Federation (PNVF) president Ramon “Tats” Suzara iti maikadua nga Inter-Agency Meeting nga inorganisar ti Philippine Sports Commission (PSC) iti GSIS Conference Hall idiay Pasay City.
Karaman ni Department of Tourism Secretary Christina Frasco iti nasao a briefing iti pannakabagi ti sumurok 20 a government ken private agencies a bukbuklen ti Task Force para iti hosting manipud iti naiparuk-at nga Administrative Order No. 30 ti Malacañang.
Naiget a suporta ti inkari ti gobierno iti nasao nga event, basar ken ni Richard Bachmann a mangidadaulo iti Inter-Agency Task Force.
Naammoan a nagatendar iti taripnong ti pannakabagi ti Philippine Amusement and Gaming Corp., Departments of Trade and Industry, Health, Foreign Affairs, Public Works and Highways, Interior and Local Government ken Information and Communications Technology.
