LAOAG CITY – Dimmawat ti pammakawan ti Philippine National Volleyball Federation (PNVF) kadagiti national athletes kalpasan nga inbutaktak ni Alas Pilipinas Men’s Volleyball team captain Bryan Bagunas dagiti napasaranda a rigat, pakairamanan iti panagsungbat iti bukodda a gastos.
Iti babaen ti maysa nga opisial a rakurak, binigbig ti Philippine National Volleyball Federation (PNVF) dagiti sakripisio dagiti atleta ken kunana nga awan national athlete ti agkasapulan a mapilitan nga umutang wenno aggastos manipud iti bukod a bulsa para iti resiponsibilidad iti pagilian.
Inbatad ti Philippine National Volleyball Federation (PNVF) a tinawid ti baro a panagidaulo ni President Frank Lao ti federation nga adda dakkel a financial liabilities ken dagiti saan pay a nabayadan nga obligasion.
Kunada pay a manarimaan ti pannakaisayangkat ti komprehensibo a panangtingiting ken reconciliation dagiti financial records tapno maamoan ti kasasaad ti pondo ti organisasion.
Malaksid iti daytoy, personal a nagabunar ni Lao tapno masungbatan ti sumagmamano nga insigida a kasapulan ti Men’s National Team sakbay ti Asian Games, karaman ti allowances, ticketing ken visa requirements.
Nupay kasta, nagpudno ti federation a saan nga umdas dagiti addang a dagitoy ken nagkari a papisaen ti financial accountability ken suporta para kadagiti national athletes.
Kabayatanna, kuna ti Philippine Sports Commission (PSC) nga agtultuloy ti panagsuportada ti Alas Pilipinas ken makitinnulong iti baro a panagidaulo ti Philippine National Volleyball Federation (PNVF) tapno masungbatan dagiti kasapulan ti national team.
