LAOAG CITY – Naisayangkat ti public hearing nga indaulwan ti IPMR wennu Indigenous Peoples’ Mandatory Representative Cheryll Tabangay iti Sang Panlalawigan kadwana ti National Commission on Indigenous Peoples nga inatendaran dagiti “tribal chieftain, municipal IPMR” ken “Barangay IPMR ti intero nga Ilocos Norte.
Ditoy a natratar dagiti plano ti Indigenous Peoples’ Mandatory Representative a pagsayaatan dagiti indigenous people kas panangtungpal ti kalikagom ti Gobierno Probinsial a saan a mabaybay-an ti nasao a grupo.
Kuna ni Tabangay a karaman kadagiti napagsasaritaan iti public hearing ket ti tarigagay na a pannakairaman kadagiti aktibidad ti gobierno probinsyal ti tinawen a selebrasyon ti Indigenous Peoples’ month ken ti pannakaiyatiddog ti aldaw a panangrambak dagiti Indigenous Peoples’ iti naisangsangayan nga aldaw para kadakuada.
Kuna ni Tabangay a napagsasaritaan da pay ti pannakailungalong ti ordinansa a nakailanadan ti pannakaiyuswat ti “mandatory consultation” kadagiti Indigenous Peoples’ no adda dagiti agkalikagum a mangipabuya iti kultura dagitoy.
Mainaig iti daytoy, nagyaman ni Tabangay kadagiti Indigenous Peoples’ ditoy probinsia gapu ta sangsangkamaysa dagitoy a nangsuporta kadagiti plano na nga iyendorsar a gakat iti Sang. Panlalawigan.
Nupay kasta, inlawlawagna a masapul nga adalen pay nga umuna ti National Commission on Indigenous Peoples no awan ti nasalungasing a pagalagadan ti Indigenous Peoples’ Rights Act of 1997 (IPRA Law) sakbay a naan-anay a maidasar dagitoy iti Sang. Panlalawigan.
Namnamaen ni Tabangay nga iyalisto ti National Commission on Indigenous Peoples ti panangadal na kadagitoy tapno maidasarnan iti Sang. Panlalawigan iti sumaruno a regular session.
