LAOAG CITY – Nailayon ni Indigenous Peoples Mandatory Representative Cheryll Tabangay a mangibagi kadagiti indigenous people ditoy probinsia iti Sang. Panlalawigan.
Daytoy ket kalpasan nga awan ti nanglaban kenkuana iti naisayangkat a panagbubutos iti auditorium ti annex ti kapitolio a naiyuswat babaen iti National Commission on Indigenous Peoples (NCIP) nga idadauloan ni Atty. Jesus Agbayani ken inatendaran dagiti pannakabagi ti Department of Interior and Local Government (DILG) ditoy probinsia.
Segun ken ni Agbayani, nga adda ti 92 a kualipikado nga agbutos wenno naikkan ti gundaway a makapagbutos kalpasan a dagitoy ti napili nga agbalin a kameng ti IP Selection Body.
Inpalagipna a kas iti nailawlawag kadagiti IP iti kallabes a taripnong dagitoy ket saan a mabalin dagiti agdama nga IPMR kadagiti barangay ken kadagiti Local Government Units (LGUs) ti agpaidasig a para IPMR ditoy probinsia.
Naammoan a sumagmamano a gunglo dagiti IP ti saan a nagatendar iti naisayangkat a panagbubutos kas kadagiti IP iti ili a Dumalneg, Adams, Carasi ken iti Brgy. Cacafean ti ili a Marcos.
Nupay kasta, inpasigurado ni Tabangay a sisasagana daytoy nga agserbi kadagiti amin nga IP, a nangipaay man ti suporta kenkuana wenno saan.
Innayonna a saanna a kayat ti agkari ngem kas iti inar-aramidna iti kallabes ket sindadaan a mangaramid iti amin a kabaelanna para kadagiti padana nga IP ditoy probinsia.
