LAOAG CITY – Maysa a babai idiay Turkey a nagparetoke ti naglibas iti ospital tapno makalibre iti bayadanna.
Napasamak ti insidente iti maysa a private hospital idiay Sisli, Istanbul no sadinno naalaan daytoy ti cellphone video ti panaglibas ti suspek.
Iti nasao a bidyu, mabuya ti babai nga adda iti kalsada iti ruar ti ospital. Nakasuot pay daytoy ti surgical gown kabayatan a makirirriri kadagiti medical staff a manglaplapped iti panaglibasna.
Makita iti bidyu a nakakabil pay laeng ti benda iti rupana ken lumlumteg pay laeng ti rupana gapu iti operasion.
Ti saanen a nainaganan a babai ket maysa a foreigner ken dimmayo laeng idiay Turkey tapno agparetoke.
Naammoan a kumplikado ti plastic surgery procedure ti suspek isu a nakigtot dagiti nurse idi kellaat daytoy a timmaray a rimmuar iti ospital kalpasan a nakariing manipud iti operasion.
Napasubli iti uneg ti ospital ti suspek babaen iti tulong ti security staff ti ospital.
Maysa ti Turkey kadagiti top destination ita dagiti tattao nga agkalikagum a maipadalan iti cosmetic surgery.
Gapu ta nalaklaka ti agparetoke iti nadakamat nga ospital, daydaywen daytoy dagiti taga-Europe ken North America para kadagiti procedure kas ti hair transplant, rhinoplasty, liposuction ken breast implants.
Basar iti impormasion, saan a nalawag no kasano a naresolbar ti insidente gapu ta nagkedked a mangipaayen ti takder ti ospital.
