LAOAG CITY – Umabot iti 3.7 grams a maatap a shabu nga agbalor iti 25,160 a pisos ti nakumpiskar dagiti otoridad manipod iti subject ti anti-illegal drug buy-bust operation a naiwayat iti Barangay 56-B, Bacsil dito ciudad ti Laoag.
Daytoy ket ni Washington Nicolas, agtawen ti 59, backhoe operator iti City Engineering Office ken residente ti Barangay 54-A Lagui-Sail ditoy ciudad ti Laoag.
Basar iti Philippine National Police, ti subject ti operasyon ket maibilang kas High Value Individual.
Naamoan nga inarestar a dagus dagiti otoridad ti suspek kalpasan a maipagarup a naglako iti maysa a sachet a naglaon ti maipagarop a shabu iti nagpammarang kas poseur-buyer.
Iti panangkapkap dagiti otoridad iti suspek ket adda ti naala da a maysa a kaha ti sigarilio a naglaon ti uppat pay nga heat sealed transparent plastic sachet a naglaon metlaeng ti maatap a shabu; P1,500 a genuine money, P3,500 boodle money a nausar iti operasyon; P1,240 a pisos a personal a kwarta na, cellphone ken dadduma pay.
Mainaig iti daytoy, inlawlawag ni Nicolas a bayat ti panagtrabaho na iti proyekto ti gobierno lokal ditoy ciudad nga agturong iti pagmulaan ti Barangay Bacsil ket adda ti dua a lallaki nga immasideg ken pinababa da manipod iti backhoe.
Kuna na nga apaman a nakababa ket ditoy metten a maipagarop a pinosasan dagiti otoridad.
Naglikudan ti suspek ti alegasyon kontra kenkuana ket dakkel ti pammati na a naipabulsa laeng dagiti ebidensya.
Nupay kasta, naamoan a nabayagen nga imonmonitor ti nailian a pulisya ti suspek ket intudo isuna dagiti immunan a natiliw iti anti-illegal drug buy-bust operation.
Gapu iti daytoy, manamnama a sumango ti suspek iti kaso a panaglabsing iti Republic Act 9165 wenno Comprehensive Dangerous Drugs Act of 2002.
