LAOAG CITY – Maminsan manen nga ipatungpal ti Metropolitan Manila Development Authority (MMDA) ti 30 a minuto nga “heat stroke break.”
Daytoy a pagannurotan ket para laeng kadagiti mangmangged ti Metropolitan Manila Development Authority nga adda iti ruar kas kadagiti traffic enforcers ken street sweepers.
Gagem daytoy a pagalagadan a protektaran dagiti mangmanggedda iti aniaman a sakit gubuay iti nabara a panawen.
Inbatad ni Metropolitan Manila Development Authority Chairman Atty. Romando Artes, maaddaan ti scheduling ti nasao nga “heat stroke break” tapno mapagtalinaedda ti presensia iti kalsada ken saan a maapektaran ti operasionda.
Naammoan a daytoy a pagannurotan ket maipatungpal agingga inton Mayo 31 no sadinno a mapalubosan dagiti Metropolitan Manila Development Authority personnel nga aginana ti 30 minuto depende iti iskedyul dagitoy.
Innayon ni Artes a maikkan pay dagitoy ti nayon a 15 a minuto a break no ti heat index iti Metro Manila ket dimmanon ti sumurok 40 degrees Celsius.
