LAOAG CITY – Dinosdosena a tattao ti natay iti napasamak nga engkwentro iti nagbaetan dagiti tropa ti baro a mangidaulo iti Syria ken dagiti nagtalinaed a napudno iti napadisi iti turay a ni dati Presidente Bashar al-Assad iti kabaybayan a paset ti pagilian.
Daytoy ti maibilang a kadamsakan pasamak idiay Syria sipud pinabagsak dagiti rebelde ni Assad idi disyembre iti napalabas a tawen ken sinukatan ti Islamist transitional government.
Basar iti war monitoring group a British-based Syrian Observatory for Human Rights, nasurok a 70 a tattao ti natay iti napasamak nga engkwentro.
Gapu iti napasamak ket naipatungpal ti curfew iti ciudad ti Latakia ken Tartous a nakapasamakan ti riribok.
