LAOAG CITY – Inlungalong dagiti sumagmamano a Senador a mapapigsa pay ti Business Process Outsourcing (BPO) Industry iti pagilian tano maliklikanen ti panagserrek dagiti sumagmamano a Pilipino iti iligal a Philippine Offshore Gaming Operators (POGO).
Iti Senate Bill 2235 nga inpila ni Senador Lito Lapid, gagem daytoy a matariparito ti karebbengan ken maipaayan ti proteksion dagiti empleado ti Business Process Outsourcing.
Nailanad iti gakat iti panangipasigurado iti nainkalintegan a panangtrato, umdas a benepisio, pribilehio ken naurnos a working conditions iti Business Process Outsourcing companies.
Naiget met a maipawil ti “understaffing” wenno “overloading,” mailungalong pay ti “regularization” ti Business Process Outsourcing workers ken patibkeren ti karebbenganda iti “self-organization,” pannakipaset iti “democratic exercises” ken dadduma pay.
Apaman nga agbalin a naan-anay a linteg, dagiti aglabsing a Business Process Outsourcing company wenno indibidual ket sumango iti multa a ₱100,000 ken pannakaibalod a saan a bumaba iti dua a tawen depende iti desision ti Korte.
