LAOAG CITY – Dua nga aldaw iti kada lawas ti pannakaipatungpal ti Open-Dalaw iti Ilocos Norte Provincial Jail (INPJ).
Daytoy ti inpakaammo ni Jail Warden Editor Guiang iti Ilocos Norte Provincial Jail.
Segun kenkuana, ti panagbisita kadagiti balud ket maipatungpal iti aldaw ti Martes ken Biyernes manipud iti oras ti alas-nuebe ti bigat agingga iti alas-tres ti malem.
Inlawlawag ni Guiang a ti panangipalubos da iti open dalaw ket tapno makapag-kinnumusta ken inniliw dagiti agkapamilya kabayatan ti kaadda iti uneg ti pagbaludan ti maysa a Person Deprived of Liberty (PDL).
Innayon na a babaen iti pannakabisita dagiti balud ket makaliwliwag da ken saan da a maburyong iti uneg ti pagbaludan.
Inpakaammo pay ni Guiang a no adda dagiti emerhensya kas koma kayat da a makita dagiti pamilya da iti uneg ti pagbaludan ket maikkan da ti 10 agingga ti 15 a minutos a makasarita dagiti nakabalud.
Maipalagip nga iti kallabes ket maminsan laeng iti kada lawas ti mabalin a panagbisita kadagiti balud iti Ilocos Norte Provincial Jail.
