LAOAG CITY – Inrekomendar ti Philippine Air Force (PAF) ti panaggatang ti 12 pay a South Korean-made FA-50 jet fighters tapno mapapigsa ti depensa ti pagilian.
Daytoy a gakat ket insubmitir iti Department of National Defense (DND) kas paset ti Rehorizon 3 Modernization Program ti Armed Forces of the Philippines a gagem a papigsaen ti kabaelan iti military intelligence, area denial, ken deterrence.
Inbatad ni Philippine Air Force spokesperson Col. Ma. Consuelo Castillo, nakadepende iti Department of National Defense ti panangaprobar iti daytoy.
Kalikagum ti nayon nga FA-50s a papigsaen ti kapasidad ti Air Force iti pannakaipatungpal ti pagannurotan.
Immunan a gimmatang ti Pilipinas ti 12 FA-50 jets manipud iti Korea Aerospace Industries iti balor a PHP18.9 bilyon a naipatulod manipud idi 2015 agingga iti 2017.
Naammoan a dagitoy a jet ket immuna a nausar iti rinnupak idi ti Marawi Siege idi 2017 para iti close-air support operations.
