LAOAG CITY – Saan nga inakseptar ni Department of National Defense (DND) ti panawagan ti China nga isardengen ti Pilipinas dagiti iwaywayat ti pagilian mainaig iti Bajo de Masinloc.
Segun ken ni Defense Secretary Gilberto Teodoro, paset ti teritorio ti Pilipinas ti Bajo de Masinloc, ken nakabasar pay daytoy iti international law, partikular iti United Nations Convention on the Law of the Sea UNCLOS ken iti 2016 Arbitral Award, dagiti iwaywayat nga aktibidad ti pagilian.
Innayon pay ti Department of National Defense (DND) a ti panangisubmitir ti Pilipinas ti updated nautical chart iti United Nations ket kalikagumna daytoy nga ipakaammo ti sakupen ti maritime zones ti Pilipinas.
Gapu iti daytoy, impasigurado ti ahensia ti agtultuloy a panangsalaknibda iti soberanya ti Pilipinas iti Bajo de Masinloc.
