LAOAG CITY – Inbatad ti Department of Foreign Affairs (DFA) nga awan epekto ti maipaspasdek nga isla ti China iti Panganiban Reef wenno Mischief Reef ken Zamora Reef wenno Subi Reef.
Naamoan a saan nga agbaliw ti status wenno kasasaad dagitoy kas low-tide elevation ken kiniddaw iti Beijing a leppasen ti okupasion wenno panagtagikua ken dagiti aktibidad kadagiti lugar.
Basar iti Deparment of Foreign Affairs spokesperson for maritime affairs Rogelio Villanueva a ti Panganiban Reef ken Zamora Reef ket agpada a low-tide elevations iti uneg ti exclusive economic zone (EEZ) ken continental shelf ti pagilian, maiyataday iti United Nations Convention on the Law of the Sea (UNCLOS) ken 2016 Arbitral Award.
Kabayatanna, dinakamat ti ahensia a ti island-building ti China iti agpada a reef ket nalawag a panaglabsing iti Philippine Maritime Zones Act wenno Republic Act No. 12064 ken United Nations Convention on the Law of the Sea (UNCLOS), kas ti panangkumpirma iti 2016 arbitral ruling.
Immunan iti daytoy, inbatad ti Philippine Coast Guard (PCG) ti sumagmamano a flare nga inparuk-at ti People’s Liberation Army (PLA) ti China kontra iti maysa nga awan armasna a Philippine Coast Guard (PCG) aircraft a mangisaysayangkat ti maritime domain awareness flight iti Kalayaan Island Group (KIG) iti kallabes.
Segun iti Philippine Coast Guard, nilappeddan iti radyo ti Chinese forces ti nakapuesto iti Zamora (Subi) Reef ti eroplano sakbay daytoy nag-land iti Pag-asa Island idi Setiembre 7 nga inaramid pay ti Chinese forces iti Panganiban (Mischief) reef.
Iti dua nga insidente, kuna dagiti Philippine Coast Guard aircrew iti radyo a panaglabsing iti international law ti presensia ti Chinese forces kadagiti reclaimed feature.
Nupay kasta, nagpanawagan ti Department of Foreign Affairs iti China ti insigida a “cease its illegal occupation and activities” iti Panganiban ken Zamora reefs ken sumurot iti pinal ken unified a 2016 Arbitral Award.
