LAOAG CITY – Imbilin ni Department of National Defense (DND) Secretary Gilberto C. Teodoro, Jr. ti pannakaipalawa ti Direct Commission Program tapno maalukkoy dagiti kwalipikado a Filipino professionals.
Ti nasao nga pammilin ket kalpasan ti gagem ti ahensia a makabukel ti adadda pay a flexible, technologically capable ken maysa a multi-disciplinary military force.
Basar iti pammilin ti Secretario iti Armed Forces of the Philippines (AFP), mapatibkerna daytoy ti ‘recruitment and commissioning’ dagiti kwalipikado a nagturpos iti Advance Reserve Officers’ Training Corps (ROTC).
Segun kenkuana, nasken nga agbalin a silulukat ti ahensiada kadagiti deserving nga indibidual a nagpa-enlist ken dagiti skilled professional nga addaan ti specialty iti nagdududma a fields kas iti cyber operations, artificial intelligence, engineering, aviation ken communications.
Malaksid kadagitoy, karaman pay dagiti Filipino professional nga addaan ti eksperiensia iti research and development ken kadagiti dadduma pay a teknolohia a nasken para iti modernization a mabalin nga maaramat para iti pannakapapigsa ti military ti pagilian.
Mainaig iti daytoy, inpetteng ni Secretary Teodoro ti pannakabukel ti training and career development programs para kadagiti personnel a na-recruit.
Ti expanded Direct Commission Program ket maysa a wagas a panangsuportar para iti modernization efforts ti AFP babaen ti Comprehensive Archipelagic Defense Concept.
