LAOAG CITY – Inabisoan ti National Grid Corporation of the Philippines (NGCP) ti publiko a saan nga agpakumpiansa nga awan ti mapasamak a power interruptions gapu iti kinabara ti panawen a mapaspasaran.
Inbatad ni National Grid Corporation of the Philippines Spokesperson Cynthia Alabanza a makitaripnong pay laeng nga umuna kadagiti sumagmamano nga stakeholders kas kadagiti generation ken distribution sakbay a mangisayangkat ti forecast iti sasaaden ti panawen.
Immunan nga inrakurak ni Department of Energy nga awan ti mapasaran a yellow wenno red alert kadagiti sumarsaruno a bulan.
Kuna ni Alabanza a saan a maikari ti National Grid Corporation of the Philippines no awan ti aniaman a yellow wenno red alerts kadagiti sumarsaruno a bulan gapu ta nakadepende daytoy iti panag-generate dagiti power plants a naapektaran ti nangato a temperatura.
Gapu iti daytoy, inabisoan ti Department of Energy (DOE) ti publiko nga agtipid iti panagkonsumo ti kuriente nangruna ita a nabara ti panawen.
