LAOAG CITY – Inkiddaw ti City Disaster Risk Reduction and Management Office ditoy siudad ti Laoag iti panagan-annad dagiti tattao iti panawen ti kalgaw.
Segun ken Dr. Melvin Manuel, mangidadaulo iti nasao a pangopisinaan a nasaysayaat no saan a rumrummuar no saan a napateg ti papanan nangruna iti oras ti alas onse ti bigat agingga iti alas tres ti malem.
Inbatadna nga ugalien ti panaginum ti danum tapno masalakniban ti salun-at iti pangta iti kinabara ti paniempo.
Mainaig iti daytoy, inpakaammo ni Dr. Manuel a nangisayangkatda ti training kadagiti opisial ti barangay iti intero a siudad kas maysa nga addang nga al-alisto a panagresponde no adda dagiti agkasapulan ti tulong gapu iti epekto ti napudot a panawen.
Inlawlawagna nga iti 80 a barangay ket adda ti 20 nga indibidual iti tunggal barangay a nasursuroan ti basic life support training ken bandaging tapno dagitoy ti mangipaay ti umuna a panangtaming kadagiti pasiente sakbay a makadanon dagiti kameng ti City Disaster Risk Reduction and Management Office wenno dadduma pay a rescue team.
Kabayatanna, babaen iti daytoy ket masigurado a mataming nga insigida dagiti tattao ken maliklikan ti saan a dagus a pannakataming dagiti indibidual.
