LAOAG CITY – Inbatad ti Malacañang a saanna kontraen ti panagkalikagom ni dati a Justice Secretary Leila de Lima nga agtestigo iti pannakausig ni dati a Presidente Rodrigo Duterte iti International Criminal Court gapu iti kaso na a crimes against humanity.
Daytoy ti inbatad ni Palace Press Officer Undersecretary Atty. Claire Castro iti press briefing.
Kuna ni Castro a no boluntaryo nga aramiden daytoy ni de Lima ken palubusan ti International Criminal Court ket saan da a lapdan ken kontraen.
Immunan nga inpublikar ni de Lima a nakaisumitiren ti ebidensya iti International Criminal Court ken nakasagana a mapan agtestigo no paawagan ti nasao a korte.
Maipalagip a ni de Lima ket maysa kadagiti kangrunaan a kritiko ni dati a Presidente Duterte.
