LAOAG CITY – Maysa a babai idiay Cheshire, England ti nangisalakan ti baby hedgehog ngem nakigtot daytoy idi naammoanna a dekorasion laeng iti bonnet.
Iti online post ti Lower Moss Wood Nature Reserve and Wildlife Hospital, inyestoriana ti insidente maipanggep iti maysa nga agtawen ti 70 a lola a nakakita ti hedgehog iti highway ken inkabilna iti pagtaenganda tapno taraknen.
Segun kenkuana, apaman a simmangpet iti pagtaenganda, pinadasna a pakanen ti cat food ngem saan daytoy a nangan. Saanna daytoy nga ingkankano idi damo gapu ta inpagarupna a saan laeng daytoy a sanay iti baro nga environment-na.
Dagiti simmaruno nga aldaw, nagdanag ti lola gapu ta nagpatnag a saan a nangan ti hedgehog ken saan a nagrugit.
Insigida met daytoy nga inpakaammona iti animal hospital ken binagaan dagiti beterinario isuna a saan daytoy a maysa nga hedgehog ken maysa laeng daytoy a pompom a naregreg iti maysa a bonnet.
Iti maudi, dinayaw ti Lower Moss Wood Nature Reserve and Wildlife Hospital ti lola gapu iti panagbalin a mannakaawat kadagiti stray animals iti baet saan a pudno nga ayup dagitoy.
