LAOAG CITY – Nagpadispensar ti maysa nga ospital idiay England kalpasan ti panagusarda ti maysa nga skeleton model kas nangisabitanda ti IV drip iti pasienteda.
Naitaray ti maysa nga agtawen 28 a ni Cleo Rowlings idiay alisbury District Hospital gapu iti nariknana a nakaro a sakit ti ulo a mapatta-patta a meningitis.
Segun iti ina ti pasiente, a ni Alexandra Leat, napno ti emergency department iso ti gapuna nga immabotda iti 19 nga oras iti corridor.
Mainaig iti daytoy, gapu iti kinakurang ti ramit ti ospital, insabitda ti IV drip ti pasiente iti stand a maususar para iti medical teaching skeleton.
Malaksid iti daytoy, dinakamat pay ni Alexandra nga adda pay dagiti sumagmamano a pasiente nga insabitda ti IV-da kadagiti picture frame gapu ta awan ti available nga IV stands.
Nakigtot ni Leat iti nakitana, ngem naawatanna a marigrigatan met dagiti staff gapu ta napno ti ospital ken kadagiti ramit ken kadagiti amin a kwarto.
Kabayatanna, kalpasan ti panag-viral ti ladawan ti pasiente a ni Rawlings, insigida a nagpadispensar ti ospital ken inadmitirda nga “unacceptable and insensitive” ti nagbalin nga isidente.
Segun kadakuada, kinasaritadan ti staff nga adda pakainaaiganna iti insidente ken pinalagipanda ti empleadoda mainaig iti umno a procedures.
