LAOAG CITY – Ibilang ti Department of Tourism (DOT) nga ad-adda pay a ngumato ti bilang dagiti turista kalpasan a napirmaanen ti implementing rules and regulations para iti Value-Added Tax Refund dagiti Non-Resident Tourist.
Ti nasao nga addang ket maikkan dagiti foreign tourist nga agaplikar iti value-added tax refund para kadagiti nagatang a lokal a produkto manipud iti accredited stores.
Nailanad iti Republic Act No. 12079 a pinirmaan ni Presidente Ferdinand Marcos Jr. a dagiti non-resident tourists wenno foreign passport holders ket maipaayan ti VAT refund kadagiti nagatang a lokal a produkto nga agbalor ti tallo a ribu a pisos ken daytoy ket ikabil iti ruar ti pagilian 60 nga aldaw kalpasan a nagatang.
Maisubli ti tax refund iti babaen ti electronic bank transfer.
Indauloan da Finance Secretary Ralph Recto, Bureau of Customs Commissioner Bienvenido Rubio ken Bureau of Internal Revenue Deputy Commissioner Marissa Cabreros ti panangpirma iti Internal Rules and Regulation.
