LAOAG CITY – Dimmawat ni P/Col. Frederick Obar, Provincial Director ti Ilocos Norte Police Provincial Office ti pammakawan iti publiko a nakairamramanan dagiti tallo a pulis iti viral video.
Segun kenkuana, aramiden ti amin ti Philippine National Police tapno mapagsungbat dagiti indibidual nga adda ti naaramidna a maikanniwas iti paglintegan.
Inbatadna a saan a kanunungan ti nailian a pulisia dagiti pulis a nagbasol wenno naglabsing kadagiti ipatpatungpalda a pagannurotan.
Inlawlawagna a manarimaan pay laeng ti iwaywayatda nga imbestigasion mainaig iti insidente tapno masigurado nga agbalin a patas iti panangtingiting iti napasamak.
Inpettengna a no mapaneknekan nga adda ti nalabsing dagiti nasao a pulis ket posible a sumango dagitoy ti administrative case ken criminal case.
Mainaig iti daytoy, kuna ni P/Col. Obar malaksid laeng ti iwaywayat nga imbestigasion ti Ilocos Norte Police Provincial Office ket adda pay ti bukud nga imbestigasion ti Police Regional Office maipanggep iti insidente.
Naammoan a dagiti maseknan a pulis ket manarimaan nga adda iti Ilocos Norte Police Provincial Office pakairamanan ni P/Maj. Jonevale Maramag ti Hepe ti Pasuquin Municipal Police Station kabayatan a maiwaywayat ti imbestigasion.
Maipalagip a nareliboan dagiti tallo a pulis gapu iti maipagarup a panangdangran ken panangtutukda ti paltog kadagiti residente a nagkamang iti kuerpo ti pulisia.
Kabayatanna, nagpalagip ni P/Col. Obar kadagiti amin a pulis a masapul a maipakat latta ti maximum tolerance iti baet ti agdama a situasionda.
