LAOAG CITY – Napatawan ti citation ticket wenno multa nga P150 dagiti dua a personnel ti Philippine National Police – Laoag a nag-counterflow iti rotunda nga asideg iti Ferdinand E. Marcos Stadium ditoy suidad ti Laoag.
Daytoy ti impakaamo ti Ilocos Norte Police Provincial Office (INPPO) kalpasan a nag-viral ti maysa a video a nangipakita iti inaramid dagiti kameng ti pulis.
Kalpasan a nabigbig dagitoy ket insigida a nakisarita kadakuada ti Chief of Police ken ti Provincial Director iti Ilocos Norte Police Provincial Office (INPPO).
Nupay kasta, inbatad ti Ilocos Norte Police Provincial Office (INPPO) a gapu ta kameng iti Philippine National Police – Laoag dagiti maseknan ket inpaimada ken ni Chief of Police Pol. Lt. Ryan Retotar iti pannakaisayangkat ti naun-uneg nga imbestigasion ken ti desision no adda pay dagiti dadduma a maipataw a sanctions wenno pannusa kadakuada.
Naamoan a dagiti nadakamat a kameng ti pulis a nag-counterflow ket rumrumuar kabayatan a naka-deploy iti PNP Protect Box iti sangoanan iti Mariano Marcos State University iti suidad ti Laoag.
Maipalagip a nairekord iti maysa a dashcam ti panag-counterflow dagiti dua a polis a nakalugan ti motorsiklo no sadinno dandani a nadungpar gapu iti saan nga umno a panagdalyasatda iti kalsada.
