LAOAG CITY – Balligi ti pannakaarestar dagiti dua nga indibidual a maibilang kas wanted person ditoy probinsia ti Ilocos Norte babaen ti nagsina nga operasion nga insayangkat dagiti otoridad.
Segun iti Ilocos Norte Police Provincial Office ket ti umuna nga operasion ket naiwayat kontra iti maysa a lalaki gapu iti kasona a Qualified Theft iti ili ti San Nicolas.
Ti suspek ket agtawen 40, naasawaan ken residente ti Brgy. 19 San Lorenzo iti ili ti San Nicolas.
Natiliw ti suspek babaen ti bileg ti warrant of arrest gapu iti panaglabsingna iti Article 310 wenno Qualified Theft no sadinno ket narekomendaran daytoy ti piansa a Php 10,000 para iti temporario a pannakawayawayana.
Kabayatanna iti sabali pay a naiwayat nga operasion ket naarestar met ti maysa a babai iti ili ti Bacarra gapu met iti kasona nga Estafa.
Ti suspek ket babai, agtawen 49, naasawaan, maysa a saleslady ken residente ti Brgy 25, Sta Cayetanano ditoy siudad ti Laoag.
Naarestar ti suspek babaen ti bileg ti warrant of arrest nga inparuk-at ni Hon. Jonathan Albano Asuncion, Presiding Judge, Municipal Trial Court in Cities, First Judicial Region, Municipal Trial Court in Cities, Laoag City, Ilocos Norte no sadinno ket dua a Criminal cases ti naipila kenkuana ken narekomendaran daytoy ti piansa nga Eighteen Thousand Pesos (Php 18,000.00) para iti tunggal kasona.
